ദിശാ സൂചികള്‍ തുരുമ്പെടുക്കുമ്പോള്‍ ..

തുരുമ്പൊരു...

മാറ്റമാണ് മറ്റൊന്നിലേയ്ക്കുള്ളതിന്റെ,

പ്രതീക്ഷയാണ് പുതിയതിന്റെ,

ശീര്‍ഷകമാണ് നാശത്തിന്‍റെ,

പ്രതീകമാണ്‌ വിപ്ലവത്തിന്‍റെ,

അനിവാര്യതയാണ് കാലത്തിന്‍റെ,

ഓര്‍മ്മപ്പെടുത്തലാണ് ചരിത്രത്തിന്‍റെ.

ദിശാസൂചികള്‍ തുരുമ്പെടുത്തൊടിഞ്ഞ് തൂങ്ങുന്നു ,

കാലമേറെയായില്ലയെങ്കിലും...

ലക്ഷ്യമതിന്നുമൊന്നുതന്നെ

നീതി ,നേര്‍വാഴ്ച

ശാന്തി സമാധാനം

സമത്വം നിര്‍ഭയത്വം.

നേരുകള്‍ പിടയുന്നകാഴ്ചകള്‍ കാണുവാന്‍

നീട്ടിയകണ്ണടയില്‍കുറിയും വരയുമിരുട്ടും

സത്യത്തിന്‍ നൂലിനാല്‍കെട്ടിയ ഊഞ്ഞാലില്‍

കളവുകള്‍ ആടിതിമിര്‍ക്കുന്നകാഴ്ചകള്‍ കണ്ട്

അരാഷ്ട്രീയം വേരുകളാഴ്ത്തിയ വിശപ്പുമായ്‌

ദിഗ് ഭ്രമം പെട്ട് നില്‍ക്കുന്നു നാം പഥികര്‍

അഞ്ചാണ്ടിലൊരുനാളിലൊരു

നേരമ്പോക്ക് പോല്‍

വിരല്‍ത്തുമ്പില്‍പ്പുരട്ടുവാന്‍

മഷിതേടിയെത്തുമെങ്കിലും

ശീലങ്ങളില്‍ മറവിക്കഗ്രസ്ഥാനം കൊടുത്ത്

ദിഗ് ഭ്രമം പെട്ട് നില്‍ക്കുന്നു നാം പഥികര്‍

പുതുവഴിതേടുവാന്‍ കൈക്കോട്ടെടുക്കുവാന്‍

നേരിന്‍ പുസ്തകത്താളില്‍നിന്നക്ഷരങ്ങളുണരട്ടെ...