മൂക്ക് കയര്‍

ഗ്രാമം
കാളകളെക്കാള്‍ വില
മൂക്ക്കയറിനാകയാല്‍ ചന്തയില്‍
അര്‍മ്മാദിച്ച് നടക്കുന്ന
കാളകളുടെ താന്തോനിത്തം !

പട്ടണം
സംവിധായകന്‍ ആരെന്നു
അറിയാത്ത നാടകം
കഥാമുഹൂര്‍ത്തങ്ങളും സംഭാഷണങ്ങളും
അറിയാത്ത കഥാപാത്രങ്ങള്‍
വേദിയെവിടെയെന്നും  പ്രേക്ഷകര്‍ ആരെന്നും
അറിയാത്ത സംഘാടകര്‍ !

നഗരം
മുല്ലപ്പു പരിമളം ഇറച്ചിപ്പുരയില്‍
പരിലസ്സിച്ചപ്പോള്‍
ആത്മഹത്യ ചെയ്തു
വിചാരണകളും തൂക്കുകയറും !

****************

ചില താഴുകള്‍ തുറക്കാനുള്ള
താക്കോലുകള്‍
കാലത്തിന്റ്റ്‌ കയ്യില്‍ മാത്രം
ഭദ്രമായിരിക്കുന്നു
ഛെ !
ഞാന്‍ ജീവിച്ചിരിക്കുന്നു പോലും
നിഘണ്ടുവില്‍ നിന്നും ലജ്ജയെ
പറിച്ച് കളയാം വേരോടെ !!

പഞ്ച നേട്ടങ്ങള്‍ ...

നേടിയതിനെക്കാളേറെ
നേടാത്തതായി
ശേഷിക്കുന്നതെന്തോ
അത് ജ്ഞാനം .....

നേടിയതോളം
പിന്നേം നേടാന്‍
മോഹിച്ചുകൊണ്ടേയിരിപ്പതെന്തോ
അത് പ്രണയം ..

നേടിയ ഞൊടിയില്‍
മതിയെന്നുമൊരൊട്ടുനേരശേഷം
നേടാന്‍ തുനിയുന്നതുമെന്തോ
അത്  കാമം ...

നേടിന്നേടിയിട്ടെത്രകരുതിവയ്ക്കിലും
ചിലപ്പോളൊരുരാവിരുട്ടിവെളുക്കുകില്‍
ഒന്നുമല്ലാതായിത്തീരുവതെന്തോ
അത്  ധനം ...

നേടുവാനൊട്ടുമേ
ഇഷ്ട്ടമല്ലെങ്കിലും
നേടിയെതീരുവതെന്തോ
അത്  മരണം..

കട്ടില്‍ ....

നാലുകാലുള്ളോരു  കട്ടില്‍
ഞാന്‍ ,മനുഷ്യരുറങ്ങുന്ന കട്ടില്‍

തൊട്ടിലോരത്താക്കും കട്ടില്‍
ബാല്യ കൌമാരങ്ങളുറങ്ങുന്ന കട്ടില്‍

ഒറ്റയ്ക്കുറങ്ങുന്ന കട്ടില്‍
അവരൊരുമിച്ചുറങ്ങുന്ന കട്ടില്‍

ആദ്യമായധികാരമാളുന്ന കട്ടില്‍
മഞ്ചാടിമണികള്‍ പുരളുന്ന കട്ടില്‍

ആനന്ദം പകര്‍ന്നാടുന്ന കട്ടില്‍
 കണ്ണീരൊഴുകുന്ന കട്ടില്‍

രാജാവുറങ്ങുന്ന കട്ടില്‍
കീഴാളുറങ്ങുന്ന കട്ടില്‍

വേശ്യാലയത്തിലെ കട്ടില്‍
കാമം മരിക്കുന്ന കട്ടില്‍

വൃദ്ധസദനത്തിലെ കട്ടില്‍
ആതുരാലയത്തിലെ കട്ടില്‍

നിദ്രയിലെല്ലാരുമൊന്നാകും കട്ടില്‍
അറിയാതെയന്ത്യമായിട്ടുറങ്ങുന്ന കട്ടില്‍
.......................................
.......................
(കാണാത്തതായിനിയെന്തുണ്ട്
കേള്‍ക്കാതതായിനിയെന്തുണ്ട്
പറയാത്തതായിനിയെന്തുണ്ട്
ഓര്‍ക്കാത്തതായുമിനിയെന്തുണ്ട്)

ഒരു കട്ടില് തന്ന പണിയേ.........:))

അഹിംസാലുവായ ചിലന്തി.

അഹിംസാലുവായ
ചിലന്തി
സ്വയം
ഹിംസകനായ്‌.......

വല കെട്ടാതെ,
ദ്രവം നിറഞ്ഞു പൊട്ടി
ചിലന്തി
മരിച്ചു പോയ്‌

അതില്‍ ഇരകളാവേണ്ട
പ്രാണികള്‍
മരണം കാത്തു കിടന്ന്

വിഷമിച്ച്
മറ്റേതോ
വല തേടിയലഞ്ഞു ...

മൊട്ട്

വിരിഞ്ഞ
പൂവിന്‍റെ
വീഴുന്ന
ദളങ്ങളെ
നോക്കി
പൂമൊട്ട് കരഞ്ഞു...

വേണ്ട തനിക്കുമീ
ദുരവസ്ഥ,
വിരിയാതിക്കാന്‍
എന്തുണ്ട് വഴി...?

പക്ഷെ
മറ്റൊരു
മൊട്ട്
അതിന്‍ തണ്ടിലുണ്ടല്ലോ
അതിന്‍റെ
മിഴിനീര്‍
ഒഴുകുവതെങ്ങോട്ടു....?